家居風水說豪宅必定好風水？

首頁

        近日工作非常忙，所以無乜稿比大師兄編輯，好在大師姐白如雪，最近有幾篇風水文章，等我偷懶都唔會被人追。

        記得我初初學風水時，一聽到有人講風水，就會特別留心聽。有一次飲茶，聽到幾個茶客坐埋一齊，其中一個口水多個浪。佢說話滔滔不絕，講下講下，就講到風水。

        一聽到有人講風水，我當然會特別敏感，想聽清楚佢地講乜？佢話：「買樓唔一定要用羅盤黎睇風水既，揀風水樓實在好容易。」佢隔鄰既朋友就好奇咁問佢：「唔用羅盤睇風水揀樓﹖咁用乜野方先法知道層樓係風水樓呢﹖」

        口水多個茶呢位茶客就立即坐直個身，好權威咁話：「只楝豪宅黎買就得啦！」朋友疑惑：「買豪宅就得﹖凡豪宅都係風水樓？」

        茶客繼續講：「你諗下，買層豪宅要用幾多錢，閒閒地幾千萬。可以搵到幾千萬買豪宅，仲會衰得去邊啊！」

        我聽到個心都有疑惑：「係唔係真呢？」本來想聽下佢仲有乜理據，不過，我有約要走先，所以聽唔到佢仲有乜野講。當時我同大師姐白如雪仲未係好似而家咁熟絡，所以我就搵大師兄問。

        大師兄聽到有人話「凡豪宅都好風水」，覺得十分可笑，大師兄話﹕「無可能啦！如果所有豪宅 既風水都好，就無「家道中落」呢個形容詞啦！而且夠錢買豪宅，唔代表一路咁好運，如果行衰運破產，就連豪宅都要賣埋添啦！」

        大師兄講得好合理，佢仲同我話：「你只不過學左幾堂風水，學識 尚淺，將來你就會知道風水既影響力——令公屋 有人住到發達､豪宅有人住到破產。」

        當日雖然未識大師兄所講既風水學理，但就好肯定豪宅未必好風水。

風水玄學權威白鶴鳴弟子 方中圓 
        本文刊載日期2017年10月13日

最受歡迎風水用品

,

訂購風水用品專頁