女人去廁所都講風水﹖

尋日講過，我同大師兄匡正去完廁所之後，討論個廁所尿兜風水呢件事。其實我仲突然諗起一啲野，既然講開廁所風水，男人揀尿兜嘅風水，同女人揀廁格嘅風水，睇法有乜唔同﹖

我問大師兄：「廁所風水，尿兜龍虎，係以向住牆計，咁女廁廁格，就應該係背住牆計龍虎啦，啱唔啱？」大師兄又唔正經咁笑：「乜你咁鍾意研究廁所風水架。」

我話：「師傅話過，學風水最緊要一理通百理明，舉一反三，所以我諗下諗，覺得女人去廁所嘅風水同男人唔同，想問下你嘅睇法啫！」

大師兄答：「好啦！你講嘅全中！男人小便面向牆，即係以牆做向；女人小便去廁格，係背住牆，所以就以牆做坐。所以男人去小便時候嘅青龍方白虎方，係同女人去小便時候嘅青龍白虎相反！」

喺大師兄解釋完，我又再問多啲一句：「咁如果我地去廁所開大，就要坐係坐廁度，呢個時候嘅青龍方白虎方嘅睇法，就係同女人去廁所嘅龍虎一樣喎！」

大師兄又喺度笑我，佢話：「無錯！不過，你嘅興趣好特別，居然鍾意研究廁所風水。」唉！鬼叫佢係大師兄咩，我都唔敢再駁佢，如果唔係，第日有野問，佢唔答我點算﹗如果問小師姐白如雪，咪窒得我仲勁﹖

＞＞＞｜上一頁｜
　

風水玄學權威白鶴鳴弟子──方中圓
本文刊載日期2016年8月16日

風水八字改名--預約．TEL：9838 3838

歡迎轉載內容，敬請尊重版權，
請列明出處及連結「www.hokming.com」，謝謝!
　