生肖對對碰．六對不可以合作的人

首頁

        今篇所講既題目，相信幾有趣味性，不過，其實要多得大師姐白如雪。因為今次同大師兄匡正及大師姐白如雪一齊食午餐時，由於接近年尾，所以大家又講到下十二生肖運程既事。

        講起生肖，大師姐白如雪問我：「方中圓，你知唔知道有何生肖，雙方會唔夾（合唔來）？」

        我即時答：「最唔夾既生肖，當然係鼠同馬、牛同羊、虎同猴、兔同雞、 龍同狗 、蛇同豬。」而大師姐聽到後，笑住話：「小師弟唔錯，全中﹗」大師兄聽到就係到笑，唉！咁簡淺既入門 學問，我點會唔識丫！咁都問我，就係當我風水玄學見識少喇，攪到我都好尷尬。

        大師姐見到我個樣，笑得仲開心。佢笑到夠，就再問我：「你知唔知，坊間仲流行緊一套講法，話有幾組生肖係特別唔夾既？」我真係一時間想唔起，唯有直接問答案：「大師姐，你直接講我聽啦？」大師姐話：「其實呢套就講法，係應該叫做生肖對對碰。」

        我好奇問：「生肖對對碰？」大師姐笑笑口話：「係我想出黎既形容詞。」呢時，我有機會啦！等我擦下鞋先！大師姐果然係博士生，連呢個名詞都想到出黎。大師姐話：「唔好擦鞋，講你聽啦！」我立即話：「洗耳恭聽。」

        大師姐繼續講生肖對對碰：「基本上，有以下幾種生肖對對碰。坊間有以下既流傳﹕

        生肖屬「虎」既人剋生肖屬「羊」既人──因為送羊入虎口。
        生肖屬「豬」既人剋生肖屬「虎」既人──因為扮豬食老虎。
        生肖屬「虎」既人同生肖屬「虎」既人互剋──因一山不能藏二虎。
        生肖屬「雞」既人同生肖屬「狗」既人互剋─因為雞犬不寧。
        生肖屬「狗」既人剋生肖屬「虎」既人──因為虎落平陽被犬欺。
        生肖屬「狗」既人同生肖屬「狗」既人互剋─因為狗咬狗骨。」

        我聽到後答訕：「原來老虎都會怕狗同豬，係唔係真架？」大師姐眨一眨眼：「你當茶餘飯後答訕既笑話就算啦！坊間流行既諺語，大部份都完全無玄學根據，聽下就算啦！」

風水玄學權威白鶴鳴弟子 方中圓 
        本文刊載日期2017年12月5日

最受歡迎風水用品

,

訂購風水用品專頁