尋日同師傅同埋匡正大師兄一齊食飯，因為就快到鬼節，大師兄講開最近有幾位睇風水嘅客人，都問到有關鬼節嘅嘢。我就答咀問大師兄d客
多數問乜。
大師兄話︰「都係普通問題，師傅教左我地咁耐，要答佢地輕而易舉啦！」
師傅聽到都笑說︰「匡正跟我學左幾十年風水，一般風水問題點會有難度。唔好講普羅大通，即使係行內人，都無幾多個可以考到你大師兄嘞。」
我呢個世界仔即時話︰「咁就當然啦！三十幾年前，都仲未興風水，剩係興睇相睇掌
和八字，到師傅講紫微斗數嘅時候，出面d人都唔知乜野係紫微斗數添啦。」
大師兄話︰「果時我學紫微斗數，都係師傅話俾我聽紫微斗數幾好，斷事比起八字會多好多，叫我一定要學，咁我先會學得到紫微斗數！」
愈講愈遠，明明講緊個客嘅問題，我就繼續問大師兄d客問乜野。大師兄話︰「來去都嗰d喇，有客人問鬼節嗰個月係唔係唔可以搬屋﹔有客就問鬼節有乜嘢可以保平安﹔有客問使唔使喺門口掛楊柳枝。」
講開楊柳枝，我細個果陣，屋企都一樣係清明節時候，大門掛楊柳枝，我問大師兄話︰「清明節時候，好多人都會喺門口掛楊柳枝嚟辟鬼。咁
盂蘭節係唔係都可以係大門掛楊柳枝嚟辟鬼呢﹖」
大師兄望一望師傅，然後話︰「係，有用嘅！不過，我以前都比師傅窒過！師傅問我，喺七月邊度買楊柳枝呀？我諗！係喎！喺七月真係好少有得賣楊柳枝嘅，咁我唯有問番師傅咁點算啦﹗師傅話好簡單！用碌柚葉一樣得！」
我聽到先諗起，係喎，碌柚葉都一樣係可以辟邪，又容易買到。真係又學到嘢嘞！同師傅､大師兄一齊食嘢，真係次次都學到嘢！所以，今次埋單，我都爭住找數。
