我研究風水八字､玄學術數時間雖然
唔算短，但肯定無大師兄匡正咁叻，造藝更加唔敢望有白鶴鳴老師細半咁勁。所以我好多時，我都要問下匡正大師兄或者老師，始終佢地饗風水命理方面，可以話食鹽多過我食米
。
我以前聽過師傅講，「兆頭」有時可以好準。因為兆頭都可以係外應既一種，如果間屋出現左唔好既兆頭，要立刻跟一跟風水，因為風水衰先會發生衰嘅嘢。而我地幫人占卦時，如果聽到烏鴉叫，支卦通常都會係衰卦，乜都唔惦。
有日我突然想起，有一D地方成日都會聽到烏鴉叫聲，咁尼D地方咪無運行，衰足一世二世，或者衰足唔知幾多世﹖我都係突然諗起呢個問題，但都唔敢成日麻煩老師，所以就搵下大師兄問問先。我見到大師兄就即刻問佢︰「大師兄，老師以前話聽到烏鴉叫，兆頭唔好！如果當時占緊卦，就可以當衰卦睇！你有無聽過
老師咁講」大師兄聽到立即答︰「係丫！」我跟住又問︰「但有一D地方，成日都有烏鴉叫，咁係唔係風水都一定差。」大師兄話我︰「你真係無聽晒師傅講，學野要靈活變通，唔可以一本通書睇到老。」
我聽到唯有傻笑兩聲答︰「係嘅係嘅，我唔應該成日遊魂，要專心d。:p」大師兄笑住答我︰「凡係時常發生嘅事，就應該當係無乜嘢事。所以如果有一個地方，日日都有烏鴉出現，十年如是，百年如是，這烏鴉就唔算係唔好兆頭。例如占卦，你占卦嘅地方，本來就日日有烏鴉飛過，呢段時間聽到烏鴉叫係正常嘅！但如果你住既地方，平時好少見到烏鴉，但有一日，你同人商量緊一盤新嘅生意時，又咁啱聽到烏鴉叫，咁就最好再諗做呢盤生意嘞，因為係一種唔好預兆，怕會血本無歸。」
聽完大師兄咁講，我即刻明晒，順便講兩句擦下大師兄鞋，大師兄聽到仲笑我係擦鞋仔，唔緊要啦，大師兄一向咁肯教我嘢，我又可以知多D嘢，最緊要大家開心嗻﹗
編輯部小師弟──山中七日
本文刊載日期
2015年7月22日