在水中央房屋的風水坐向

        前兩日約匡正大師兄去happy hour，佢話小師妹白如雪已經約左佢，話有d風水嘅嘢要問下。我話咁一齊喇，等我都聽下學多d嘢。其實又真係無乜所謂嘅，因為我地三個已經好熟好friend。

        不過尋日我有事遲到左大半個鐘，去到嗰時雖然仍然未過happy hour，但係大師兄同小師妹已經傾左好耐，我只聽到佢地傾緊閒偈，所以小師妹要問嘅風水問題應該已經問完。

        今次錯過左個學嘢嘅機會添，不過見到咁可愛既小師妹都無乜所謂啦，就同佢地吹下水都好丫。不過我坐低無幾耐，小師妹就笑笑口問我一個好特別嘅風水問題。佢問︰「我啱啱睇到個電視節目，見到有一間屋係海中間，其實呢啲咁嘅屋，點樣定風水坐向呢？」
        呢個小師妹丫，你有乜理由唔問大師兄 呢﹖你咁樣問我分明想考我啦﹗我望一望大師兄，佢就坐係度睇戲，又唔塔咀，我仲覺得佢好似陰陰咀笑添。好在呢個問題好耐以前老師都講過下，我都仲記得d。我答︰「係海中間嘅屋都一定 可以定到坐向嘅，呢類屋嘅坐就同一般陽宅一樣，坐向相當緊要，會對間屋既風水影響好大！」

        我見到小師妹個樣有d得戚，肯定佢已經知答案，想睇下我識唔識就真。我話︰「風水，有山靠山﹑有水向水，所以海中間嘅屋，風水坐向就梗係向門口啦！即係以門口做向，而向嘅對面就係坐嘞。」
        小師妹聽到後，個樣就無咁得戚，我應該無答錯喇。而大師兄「坐山觀虎」鬥完之後，望住我講左句:「我仲怕你唔記得添！」

        天時暑熱，小師妹最鍾意飲凍野，大師兄同我， 再加埋個小師妹，話題唔止風水命理，因為小師妹d大學同學，有d已經番番國內，不過佢地嘅微信群組，就發放左好多趣事，引發好多趣味話題。如果第日同大師兄食飯，叫埋小師妹，一定多好多樂趣。