風水擇日
天喜星如何添丁
因為朋友多，仲要大部份入於豬朋狗友類，所以我地成班人無無聊聊就會約埋吹下水。今次有朋友帶了一位叫Damian嘅新朋友黎。大家好好傾，講下講下已經好似識咗好耐咁，乜都講一餐，成班豬朋狗友一齊，當然都會講下「有味」笑話啦。
不過後來Damian就嚴肅起黎，佢話︰「我細佬同老婆一結婚，已經開始想製造bb仔，所以結婚咁耐，一直都無用『兔兔』，但唔知點解，到而家都未有bb。佢地又睇過醫生，驗過話果佢地兩個身體都無問題。唔知有無乜野方法，可以令佢地容易有bb呢﹖」各豬朋狗友就自由創作，各自發揮下意見，例如用乜野體位、食d乜野，點計排卵期……等等。不過佢地都當講笑咁講。
後來，Damian終於望望我問︰「丫！唔知玄學術數有無辦催丁呢？」終於入正題，睇黎，呢位新朋友已經收左風，知道我識d風水玄學嘅。
Damian笑笑口望住我問︰「有無方法可以幫到我細佬弟婦佢地呢﹖」我梗係用最正統既方法答︰「最好睇下屋企風水啦！揀個丁位，催催佢會容易好多。」Damian諗左一諗，笑住講︰「不過佢地
其實唔多信風水，更加唔肯擺風水用品，所以唔可以直接上去幫佢地睇風水。仲有無其老它方法呢？」
我聽得出佢怕我叫佢請我睇風水，所以我有d唔多高興，我又唔係睇風水賺錢，如果係要催丁，我都會叫佢請我師傅出馬，或者最起碼，都要搵我大師兄啦！不過，算啦！我都信佛既，當係結緣啦！
以前匡正大師兄講過︰「風水擇日，有一粒天喜星係可以旺丁嘅。」當時我答咀︰「既然係咁，如果係天喜星值日果日，夫妻行周公之禮，咪好容易有bb囉？」大師兄笑住話︰「理論上係o架！不過，如果有風水方位幫就梗係靈好多啦！」
既然睇風水呢個最有效方法佢唔想用，今次我又想起天喜星係可以旺丁，所以就教左Damian呢個方法，叫佢教佢細佬打開《通勝》擇天喜星果日行房。
小師弟──方中圓
(山中七日已改名方中圓)
本文刊載日期 2015年12月1日
白鶴鳴 第90部
風水命理著作
《至尊萬年曆》
你可能有與趣的文章︰
歡迎轉載內容，敬請尊重版權，請列明出處及連結「www.hokming.com」，謝謝!