風水玄學
八字喜火的人喜水的人優勝

首頁

        今次呢篇文章既內容，靈感來自大師姐白如雪，哎呀！其實唔應該話係靈感，因為，正式黎講，係我同大師姐傾偈時，大師姐講既。

        如果網友有睇開我寫既網文， 都知道我同大師姐算幾熟，我成日約大師姐食野飲野，雖然 有時亦會約大師兄，但因為佢唔似得大師姐，年紀同我咁接近，所以 我同大師姐就越來越熟。

        我地幾個坐埋一齊時，風水､八字 ，占卜､面相､八卦野､天文地理……，乜都會講。有時大師兄會講下佢既經驗､講下跟師傅白鶴鳴先生咁耐､有乜特別心得､講下風水故事､講下趣聞。

        大師姐多數會講下風水八字既見解，講下佢幫人睇既風水實例。大師兄同大師姐，都的確教識我唔少學問。

        有次大師姐講開八字，就話：「通常八字喜火既人較為著數，八字喜水既人較為蝕底。」當時我聽到，都非常好奇，所以立即追問：「點解會咁？」

        大師姐反問我：「八字喜火既人，通常喜乜野地支？」基本學理，我諗都唔使諗，就立即答：「巳午未。」大師姐又再問：「八字喜水既人，通常喜乜野地支？」我立即答：「亥子丑。」

        大師姐聽到，再問我：「通常公司上班時間幾時？」咁就難講，唔同公司唔同�諢A我唯有揀個基本 答案：「朝九晚五，但間間公司唔一樣，朝九晚六、朝八點半晚五點半、朝九晚五點半……」

        我仲未講完，大師姐就打斷我既說話：「唔使咁長氣，大部份公司一般都朝九晚五或朝九晚六啦。通常，假如工作上有計劃要同老闆開會､見客人，都多數在日間，如果八字喜火既人，早上九時至下午三點，即巳午未火方既時辰，都會旺佢地。

        如果八字喜水既人，就要夜晚先會旺佢地。公司相對少晚上先開會或見客，除一些特別行業外，例如開酒吧、娛樂行業、卡拉ok、食店、便利店……。

        所以，從呢方面黎講，喜火會相對好過喜水。日間運氣好時，同老闆或客人開會，效果會好得多。而喜水既人，多數會唔喜火，咁佢地響日間，同老闆或客人相處，關係當然相對差。所以我認為，八字喜火既人比八字喜水既人較為著數。」

        我聽完，都覺得相當有參考價值，又幾有趣，所以寫出黎同大家分享。

風水玄學權威白鶴鳴弟子 方中圓 
        本文刊載日期2017年10月24日

白鶴鳴風水命理著作
第95部
《教你幫人改好名》