白鶴鳴風水

|著作125部•暢銷報刊、玄學專欄資深作家|  風水用品:麒麟... | 首創全自動羅盤.立極尺  |

風水玄學論光頭是不是富相

首頁

 

        話說有日假期匡正大師兄唔得閒,大師姐白如雪又話約左人,所以我一個人悶悶地,走去間高級餐廳食下午茶,慢慢坐下。後來,有個衣著好光鮮既光頭佬同佢女朋友入黎間餐廳,見到餐廳內所有員工都同佢打招呼,對佢好客氣,相信佢係VIP。

        我忽然想起,以前聽過有人話「光頭」人係富貴相。以前聽左都無乜野,但係見到呢個光頭佬,都想了解下呢個講法有無玄學根據。 我對於面相學既認識,梗係無兩位大大咁叻,最後,我決定用手機通訊app,搵下大師姐。

        我問:「大師姐,係唔係光頭既人都係富相﹖」  不過佢好耐都無覆我,正想再用app追下,佢就直接打電話黎:「你咁問,我邊有可能打兩句就覆到你呀! 你唔等下次我地食飯時候先問?」 聽到大師姐咁講,我立即覆大師姐:「唔好意思,好複雜既咩﹖嘻嘻!大師姐,我心急想知道嘛!」

        大師姐聽到後就話:「古代有光頭為富相既講法,但和尚由於係自己剃光頭就唔算。另外,如果個人身體有問題,引至甩頭髮 ,亦都唔計。」我聽到尼度都有D領悟:「咁即係話,正常既人甩頭髮先係富相?!」

        大師姐話:「古代就係,現代就唔係。」咁奇怪﹖乜睇相都有分古代現代既咩﹖大師姐話: 「中國以前,以農立國,所以人民最常見既食物,都係以植物為主,肉類屬於比較貴。但有錢人家就唔同,因為有錢,餐餐都可以大魚大肉,油膩食物,如果食得多,就會容易脫髮,咁咪光頭囉!

        所以有關十個光頭九個富,師傅都話過,八零年代番大陸睇風水時, 成街大陸人都瘦猛猛,男人好少有光頭。 但而家大陸咁有錢,生活質素都同香港差唔多,自然光頭既人會多左。 而家肉食多而且唔貴,隨時餐餐油膩肉食,咪做成好多人光頭囉!

        仲有,而家既空氣又多浮游粒子、都市人又多壓力、又多捱夜、洗頭水又多化學品,咁都市人,點會唔容易甩頭髮呢? 所以『十個光頭九個富』都現代已經唔準架啦!」

        聽左大師姐咁講,我都明白晒:「多謝大師姐,你一講我就明白,你做助教,係唔同D既!」 聽到大師姐係度笑,我估我擦鞋都算擦得應卦,大師姐答:「你唔洗擦鞋勒,第日請我食餐豪架啦!」我話:「請到大師姐,食幾豪都得喇﹗」。

風水玄學權威白鶴鳴弟子──方中圓 
        本文刊載日期2017年4月10日

 

最受歡迎風水用品

開光風水用品,

 

訂購風水用品專頁

風水八字改名--預約.TEL:9838 3838

歡迎轉載內容,敬請尊重版權,
請列明出處及連結「www.hokming.com」,謝謝!